O brote de Covid que afecta á comarca da Mariña segue baixo control, a pesar do lixeiro incremento na xornada deste venres en oito casos, tres deles en Viveiro ao sumarse as persoas censadas na localidade contaxiadas por uns familiares chegados de Hospitalet. "Non teñen relación co brote da comarca, porque se trata de casos importados, pero á hora de cuantificalos si suman entre os positivos da Mariña ao ter aquí cartilla sanitaria", recorda a alcaldesa vivariense, María Loureiro, quen destaca a celeridade na actuación. "O protocolo activouse con rapidez e logrouse controlar pronto e todos están en corentena", asevera. En total, son cinco os infectados en Viveiro polo brote de Cataluña.
Un deles é unha traballadora da residencia de maiores San Bartolomé de Xove. As catro compañeiras coas que comparte quenda deron negativo nas PCR que se lles practicaron o mércores, o que supón un alivio, á espera de coñecerse hoxe os resultados aos preto de 140 internos. "Estamos tranquilos, pero en calma tensa ata que saibamos os resultados", di o rexedor xovense, Demetrio Salgueiro, quen ansía que non haxa contagios entre os maiores, ningún dos cales presentaba síntomas. "En canto soubemos do caso estiven a falar coa directiva por necesitábanse algo e estamos en contacto e confiando en que as medidas de seguridade coas que traballan na residencia de maneira escrupulosa serviran para evitar contaxios", aseverou o rexedor de Xove, quen recorda que no Concello hai dous positivos, "que se manteñen case dende o inicio do brote".
A residencia de maiores xovense é un centro pertencente á fundación San Rosendo que conta con 140 prazas. Unha residencia na que os seus traballadores volveron a traballar con Epis, máscaras FP2, pantallas, luvas, calzas e pantalóns, "case como ao principio, pero a diferenza é que agora temos medios de prevención e protección e sabemos que medidas funcionan", aseguran desde a fundación.
A iso, suman ademais o feito de que se traballa cos internos en grupos reducidos e cada un conta cunha persoa de referencia, un sistema que implantan para axudar a que os maiores se orienten mellor. Tamén decidiron que os traballadores estivesen sempre cos seus mesmos compañeiros en cada quenda para que fose máis fácil o seu illamento en caso de contaxio, como sucedeu coa traballadora infectada.
As novas medidas a adoptar no centro marcaranse en función do número de positivos que haxa; o que xa é seguro é que non se poderán renovar as visitas.
DOUS INGRESOS MÁS. Na comarca este venres contabilizáronse 56 casos activos, catro deles con ingresos no Hospital Público da Mariña, dous máis que na xornada anterior. A iso, hai que sumar as 350 persoas nas súas casas.
Os novos casos detectados este venres, xornada en que realizáronse sesenta PCR, concéntranse, ademais de en Viveiro, en Foz con tres novos e en Burela, con dous.
Lugo é a provincia galega con máis casos activos, 80, 6 máis que o día anterior. En Galicia, son 180, o que supoñen 17 máis.
