O Parlamento británico rexeitou este martes nunha votación histórica o plan de saída do Reino Unido da UE acordado por Theresa May. Armadores mariñáns con intereses na zona, sobre todo no norte de Escocia e sur de Inglaterra, manifestaron a súa preocupación polo ocorrido. O non ao acordo negociado e unha aposta por un Brexit duro suporía a súa saída inmediata de augas británicas e pasar a pescar en Irlanda e Francia, ante a falta dun plan de continxencia.
Na actualidade son 90 os barcos habilitados para pescar en augas Neafc, dos que entre oito ou dez españois adoitan operar nos caladoiros citados. No entanto, o rexeitamento ao acordo proposto por Theresa May tería menos incidencia entre a flota española que nas de países como Francia, Holanda, Bélxica ou Alemaña, que sairían bastante máis prexudicadas ao non poder traballar nunha área relativamente importante do Mar do Norte. Outra das gravemente afectadas sería a de Irlanda.
A flota inglesa tamén sairía damnificada, cren os armadores mariñáns, xa que non podería pescar en augas da UE. Isto afectaría tamén aos barcos de capital español con bandeira inglesa, uns 20 agora, obrigados tamén a deixar de pescar en augas comunitarias.
PIF. A isto hai que sumar os inconvintes que terían os ingleses para vender produtos frescos, cuxo arancel podería chegar ao 15%, ademais de estar obrigados a cumprir con todas as normas sanitarias, dado que pasarían a ser un terceiro país. Isto implicaría un problema considerable á hora dos controis nos Puntos de Inspección Fronteiriza (PIF), que en Galicia se sitúan nos portos da Coruña, Vilagarcía, Marín e Vigo, a máis diso os aeroportos.
Ambas as partes consideran que o mellor sería alcanzar un acordo. Desde o Ministerio de Pesca defenden que o acceso aos mercados europeos -o 70% dos produtos frescos que exporta Inglaterra teñen como destino a UE- debe condicionarse á posibilidade de pescar nos caladoiros ingleses. Unha liña vermella que o sector pesqueiro mariñán cre que debe manterse sen concesións, polo que demanda que defenda á flota con bandeira española.
Os armadores tampouco descartan a posibilidade dun acordo similar ao que mantén Europa con Noruega, no que a cambio de vantaxes arancelarias e controis palangreiros españois poden pescar en augas holandesas.
