Máis de 60.000 quilos descargados este mércores en Burela e por encima de 37.000 en Celeiro volveron encher ambas as lonxas de bocarte despois dunha xornada de martes en que as capturas foron aínda maiores, segundo sinalaron algunhas tripulacións, indicando que moitos barcos pescaran a cota diaria de 300 caixas.
A anchoa do Cantábrico está a arribar á costa lucense e, sen ser de talla excepcional, as tarrafas "salabardean" do aparello de cerco varios tamaños e a actividade é máxima.
Atracado en Burela para descansar, o patrón do Nolito Persebello indicaba que "largamos cerca pero hai bastante corrente e ás veces o peixe escapa". No medio deses bancos de anchoa tamén nadan outros con exemplares pequenos de "cabalón", xarda que hai que escoller, "ademais de patexo".
A terra chegaron en poucos días miles de caixas que irán sobre todo ás fábricas de conserva de anchoa. Ademais dos cerqueiros mariñáns, faenan na zona doutros portos, como o Ardosán de Portosín, A Tenencia de Sada, Ansia de Pasajes ou a Madre Consuelo de Santoña, que este mércores desembarcaba chicharro.
En canto aos prezos, pescadores recoñecían que o de máis baixa calidade chegou a cotizar a 0,12 euros o quilo pero a maioría roldou o euro e, segundo os datos de venda de ambos os portos mariñáns, houbo bocarte en lonxa entre 1,11 euros e 2,55 euros o quilo (Burela) e entre 0,80 a 2,50 euros o quilo. Mentres, as lanchas están a pescar bonito á altura de Santoña, aínda que este mércores non se vendeu na Mariña.
