O BNG de Viveiro expón eliminar os enreixados que hai ao longo da avenida Ramón Canosa, desde o antigo Casino ata Celeiro, para permitir aos veciños poder gozar desa zona portuaria e ao considerar que é unha estrutura "innecesaria ao contar vos pantaláns do porto deportivo cos seus propios peches".
A portavoz, Miriam Bermúdez, defende que eliminar este enreixado suporía "unha oportunidade para novos usos públicos", como habilitar aparcadoiros nas zonas máis próximas aos edificios, o ambulatorio ou os comercios, ou para a creación dun carril bici entre Viveiro e Celeiro que permita unha circulación "cómoda e segura para bicicletas e patíns eléctricos".
O BNG levará ao próximo pleno unha moción con este asunto na que reclama iniciar con Portos ou as administracións competentes os trámites necesarios para eliminar as reixas, tramitar a creación de novas prazas de aparcadoiro e abrir novos accesos que comuniquen esa zona cos edificios e servizos de Lodeiro e impulsar a creación do carril bici neste tramo.
