O Bloque Nacionalista Galego (BNG) de Cervo e Burela propoñen de xeito conxunto reinventar o uso da estrada LU-P-1510 que une ambos os municipios pola zona costeira para crear un viario destinado exclusivamente ao uso de bicicletas.
A idea consiste en deseñar unha "ruta ciclista segura" sobre os nove quilómetros que percorre a estrada da costa entre Burela e San Cibrao que teña as características das rutas ciclistas protexidas recollidas no catálogo da Dirección Xeral de Tráfico (DXT). Para iso sería necesario mellorar o asfalto e a sinalización, con restricións de velocidade e redución en adiantamentos, prioridade de ciclistas ou a instalación de barreiras de protección nas varandas e puntos de reparación de bicicletas ao longo do tramo.
Esta alternativa xurdiu por mor da gran afluencia de ciclistas e deportistas que utilizan este espazo, que se viu incrementada coa pandemia, e as denuncias de usuarios e veciños polo mal estado da infraestrutura.
Así, os edís municipais de Cervo, Diego Fernández, e de Burela, Mario Pillado, levarán a proposta a pleno, aínda que terá que contar tamén co apoio da Deputación. De ser así, esta estrada converterase na primeira vía ciclista deste tipo na Mariña, un reclamo para estes concellos e para a comarca.
