O BNG estreou o pasado venres unha nova reedición do pacto de goberno co PSOE no Valadouro coa idea de facer "cousas diferentes, nin mellor nin peor, pero si distintas", asevera o portavoz, Eduardo Chao, agora concelleiro de medio rural, normalización lingüística e cultura. É, concretamente neste último campo, onde chega a primeira xestión, coa contratación de dous grupos de teatro dentro da Semana Cultural, preludio das patronais.
"O teatro foi sempre unha das actividades fundamentais na nosa localidade, pois hai moita tradición e non queremos deixar de facelo", explica Chao, e nun tempo marca conseguiron dúas formacións: Tarabela Creativa, que actuou este luns con Costureiras e O Torques de Burela, que escenifica este martes O Terapeuta.
Dúas funcións que completarán os actos da Semana Cultural que xa tiña perfilada a anterior delegada, Fina Geada, "e que nós imos respectar porque así o acordamos, porque somos de palabra", explica.
O concelleiro avanza outros novos proxectos das súas áreas, como a fusión do Mercado do Outono coa Feira do Mel, a celebrar todo no mes de novembro, "e coa idea de facelo polas rúas do pobo e non nunha carpa", conta Eduardo Chao en cuxa mente está tamén a recuperación da feira de razas autóctonas, que se creou durante o seu mandato e á espera de darlle continuidade "para que sexa uns dos referentes na Mariña".
Unha cita, se o covid permíteo, celebrarase en febreiro á que seguirá en marzo o Mercado de Primavera, que esperan poder celebrar aínda que dependerá das restricións que haxa nese momento e que impediron celebralas nos dous últimos anos.
Unhas propostas ás que suman outra da área de deportes, xestionada neste caso por Eliseo Teijeiro. A súa primeira xestión será chamar á porta da Deputación para lograr unha axuda para instalar unha carpa no campo de fúbol de herba artificial, "onde xogan nenos de varias categorías e que é unha demanda dos pais e nais", recoñece o concelleiro, que se compromete tamén a mellorar as instalacións do ximnasio municipal e a dotalo de maior equipamento.
Desde o Bloque non entran a valorar os "problemas internos" do PSOE e tampouco o fan desde o partido socialista, onde ninguén se quere pronunciar "polo momento" sobre a decisión da edil Fina Geada de non aprobar as dedicacións exclusivas parciais dos dous edís do BNG, que figuraban no acordo de goberno que si rubricou, ao considerar que a desposuían de competencias. Unha medida que leva implícita o salario, tamén parcial, do alcalde socialista, Edmundo Maseda.
