O municipio de Barreiros parece terreo abonado para a lonxevidade, particularmente a feminina, á vista da cantidade de mulleres centenarias que vai sumando. Desde este xoves conta outra máis. Trátase de Ramona Castañón Junco, que agora vive en Santiago de Reinante, aínda que en realidade é orixinaria da localidade tapiega da Roda e viviu gran parte da súa vida en Ría de Abres, en Trabada. Agora vive no concello barreirense xunto a unha das súas fillas e a unha das súas netas. A pesar de ter xa cen anos, Ramona Castañón atópase moi ben de saúde e trata de ser todo o autónoma que pode. Tanto, que un día ao mes viaxa á localidade asturiana de Vegadeo para cobrar a súa pensión, ir á farmacia e comer sempre no mesmo lugar, o bar Asturias, un clásico da localidade.
Este xoves foi un día grande para Ramona e para a súa familia porque saíron a celebrar o seu centenario. Fixérono cunha comida familiar en casa Jano, un coñecido restaurante da pequena localidade de Piantón, no municipio de Vegadeo.
A súa neta, Noelia Díaz, explicaba que Ramona "está moi ben, a verdade. Ela atópase ben e busca sempre facer as cousas por si soa. Nós axudámola, pero a verdade é que ela procura facelo todo soa e axudándose dos seus bastóns conségueo, incluíndo a comida". Non renuncia tampouco a camiñar o que pode e a saír polos arredores para manterse activa, algo que consegue con moita vontade.
Precisamente a súa neta conta que Ramona esperaba o día con bastante ilusión "porque si que é verdade que falaba moito de chegar a cumprir os cen anos. Era algo que lle gustaba e do que falaba a miúdo. Agora que os cumpriu, espero que non veña abaixo, aínda que non creo".
Como é fácil supor, nunha vida tan longa tivo moitos altibaixos e momentos complicados "como cando hai catro anos perdeu o seu fillo. Iso afectoulle moito e púxoa moi triste, pero aos poucos vai sobrepóndose e nós animámola en todo o que podemos en casa", comenta a súa neta Noelia.
Pendente
Aínda terá outra celebración máis, neste caso este venres en Ames.