O alcalde barreirense, Afonso Fonte Parga, avanzou que o goberno municipal encargará en breve a redacción dun proxecto que terá por obxectivo fixar o noiro que os temporais desfixeron na praia de Altar. Aínda que a responsabilidade, tanto do dique como do paseo costeiro, é do Estado é habitual que os concellos inicien os informes para axilizar os trámites. O rexedor confía en que Costas execute este mesmo ano a sujección e outras actuacións relacionadas.
O xefe do Servizo Provincial de Costas, José Miguel Estevan, e o alcalde de Barreiros, Afonso Fonte, en compañía de varios técnicos e dun enxeñeiro, supervisaron o estado do noiro nunha visita ao lugar, este luns.
O rexedor admite que o dique e o paseo atópanse en moi mal estado debido á forza do mar tras os últimos temporais. "Temporais vainos a seguir habendo así que hai que estar preparados e de feito había xa un proxecto para isto. Trátase simplemente de axilizalo e de executalo canto antes", engade o alcalde.
Ademais de protexer o paseo, —unha responsabilidade que recae por certo na Demarcación de Costas do Estado—, o proxecto avanza tamén na intención de habilitar dous accesos á praia de Altar, que ata agora non tiña máis que un. Para iso, a propiedade do restaurante Moby Dick cede un terreo ou un paso e falta negociar con outros veciños para ver se é posible executar outra senda.
Os accesos que esnaquizara o mar estaban debidamente sinalizados para previr accidentes, pero tamén están case no aire unha caseta e uns baños da praia.
A estabilización do dique obviamente redundará nunha maior seguridade para algunhas vivendas que hai no lugar.
O Concello apurará os trámites, por exemplo a redacción do proxecto, co obxectivo de que as obras se executen este mesmo ano. "Tamén se fai así con outras actuacións que corresponden a outros organismos como por exemplo isto que acabamos de aprobar en pleno: solicitar unha subvención para realizar obras de mellora na cuberta do consistorio. Tratar duns traballos que terán un custe de 66.000 euros", dixo.
"Saíron unhas subvencións do Estado, tiñámolas tramitado e había que mandar ou acordo do pleno", matiza o rexedor, que sinala que o caso de Costas é similar. Co proxecto valórase o custo.
