O Concello de Barreiros converteuse no único da comarca mariñá en crear unha rede de voluntariado para realizar compras de primeira necesidade a aquelas persoas que se atopen nunha situación de risco para a saúde.
Así o recolle un bando elaborado pola alcaldesa barreirense, a nacionalista Ana Ermida, quen indica que a xente que decida formar parte de devandita rede de voluntariado traballará de forma coordinada cos servizos sociosanitarios.
Ermida explicou que a persoa que se atope nunha situación de risco "debe permanecer na súa vivenda e chamar ao 608.03.89.52 para trasladar cal é a súa necesidade". A partir de aí, os servizos sociais articulan con medios propios ou persoal voluntario as compras a realizar "que se farán evitando os máximos desprazamentos, polo que deben acumularse pedidos, e valorando os casos urxentes".
Tanto o persoal municipal como o voluntario permanecerá en contacto coas persoas demandantes deste servizo para a realización da compra, pago e entrega da mesma.
Ademais, a rexedora avanzou que o Concello "está a disposición de xestionar espazos para aqueles pacientes que deban permanecer illados por razóns de saúde".
YUMA. O coñecido ribadense Yuma realiza estes días como forma de colaboración un labor parecido pola súa conta. Ofreceuse como voluntario a realizar a compra a amigos e coñecidos que sexan maiores e teñan problemas de mobilidade. El vai ao supermercado e lévalles a compra a casa se o necesitan.
