Os barcos que atracan no porto de Burela xa consumiron o 57 por cento da cota durante a costeira do bonito, na que se poxaron máis de 660 toneladas desta especie na lonxa da localidade mariñá.
Estes son os datos revelados o mércores polo xerente de Armadores de Burela (ABSA), Miguel Neira, que cifrou en 662.000 quilos os vendidos ata o final do presente mes de xullo, o que supoñen cifras "moi parecidas" ás rexistradas o pasado ano.
Neira puntualizou que este ano rexistrouse "un lixeiro incremento en canto a quilos e unha pequena redución no volume de negocio como consecuencia de que este ano o prezo medio é de 4,04 euros o quilo (de bonito) fronte aos 4,18 euros da campaña pasada".
"Producíronse variacións mínimas. Si que estamos por encima das cifras de 2016 e 2017, que foran campañas moi malas", apuntou o empresario.
Deste xeito, arredor de 40 embarcacións que atracan no porto de Burela consumiron "un 57 por cento de cota", polo que Neira augura que a costeira deste ano pecharase en agosto e "non se chegará a outubro" como noutras campañas.
