O delegado territorial da Xunta en Lugo, José Manuel Balseiro, afirmou que "respecta" a dimisión da edila do Partido Popular en Viveiro, María Jesús Vale, pola "súa decepción" coa xestión que fixo Augas de Galicia das inundacións neste municipio, pero tamén aclarou que, en ningún caso, pode "compartir" os seus argumentos.
En rolda de prensa e a preguntas dos medios de comunicación, afirmou que "hai que respectar as decisións das persoas" e, neste caso, "agradecer o traballo que fixo esta concelleira" nos últimos anos "baixo as siglas do PP".
En canto aos argumentos que esgrimiu a edila para solicitar a dimisión, Balseiro dixo que en ningún caso pode "compartilos", porque "a Xunta de Galicia estivo desde o primeiro momento á beira dos afectados en Viveiro" e puxo "os medios necesarios" para restablecer a normalidade canto antes.
"Non son un técnico para dicir se o río estaba máis ou menos limpo", engadiu Balseiro, que agradece o traballo de Vale como concelleira
De feito, recordou que foi a administración autonómica "a primeira" que tivo as estradas da súa titularidade "limpas", así como que cedeu os seus medios, "e a alcaldesa de Viveiro sábeo", para colaborar en todo canto fose necesario.
"Non son un técnico para dicir se o río estaba máis ou menos limpo", engadiu, pero os propios especialistas da Xunta de Galicia que avaliaron a situación afirmaron que "estivese máis ou menos limpo", coa cantidade de auga que caeu en tan pouco tempo, resulta evidente que a canle non tiña capacidade para asumir semellante caudal. "Dixeron que isto pasa unha vez cada cincocentos anos", insistiu.
"Lamento o que pasou", especialmente o falecemento dunha octoxenaria na Xunqueira, "porque hai unha persoa que xa non está entre nós", sostivo, pero opina que a xestión por parte do goberno galego foi a adecuada para responder á situación de urxencia. En canto á dimisión, insistiu en que a respecta e a acepta.
