O delegado da Xunta en Lugo, José Manuel Balseiro, respondeu ás declaracións efectuadas o venres pola alcaldesa de ViveiroMaría Loureiro, nas que o acusaba de sectarismo político ao tratar o tema do saneamento na cidade asegurando que "non é posible acusar de sectarismo político á Xunta cando está disposta a poñer máis de sete millóns de euros para a mellora do saneamento da ría de Viveiro e, todo iso, a pesar de ser este servizo unha competencia e responabilidade exclusiva municipal".
Balseiro sinala que a rapidez que a alcaldesa reclama á Xunta debería aplicala no seu propio goberno, "xa que o equipo de goberno está a atrasar ou proxecto", polo que lle pide transparencia e que non engane aos veciños. "As datas falan por se mesmas, o 9 de maio a Xunta trasladou ao Concello de Viveiro o proxecto técnico para a ampliación da Edar e non foi ata o 19 de xullo cando a alcaldesa o someteu a información pública", dixo.
Desde a Xunta insisten en pedir ao Concello que axilice a entrega de documentación necesaria para poder licitar as obras de mellora da depuradora, orzadas en catro millóns de euros, ás que hai que sumar un proxecto complementario para a construción do emisario e que elevaría o investimento da Xunta en obras hidráulicas neste municipio ata superar os sete millóns de euros.
REACCIÓN DE LOUREIRO
A estas acusacións, a alcaldesa de Viveiro asegura que o responsable autonómico "segue mentindo" neste tema e que desde a administración local "sempre enviamos e respondemos a todo con moita brevidade".
Neste sentido, explica que foi o 20 de xuño cando desde a Xunta reclamáronlles máis información sobre o proxecto "e o 25 devolvémoslla, e o 26 de xuño enviáronnos o proxecto para a súa exposición pública". "Se levásemos desde o 9 de maio coa documentación sen contestar, saísen antes a reclamala e máis cunhas eleccións polo medio", subliña a rexedora.
