De xenética vénlle a Alicia Lombán Otero chegar ás tres cifras, posto que a que fose avoa de Galicia con 110 anos era prima súa. "Nunca pensei chegar ata estes anos", recoñecía a propia Alicia este mércores, día no que cumpriu os 103 anos. Foi unha celebración pequena coa súa neta Nuria, que se encarga de coidala, unha filla e unha irmá, que ten 20 anos menos que ela, pero recibiu moitas felicitacións, "algunhas delas por videochamada, que é algo que lle parece incríble e goza moito", explica Nuria.
Á súa idade, Alicia conserva moi ben a memoria e a pesar de que padece artrite desde hai tempo mantense activa facendo algo de exercicio. "Saír á rúa dalle preguiza porque as rúas de Mondoñedo tamén son algo complicadas, pero temos unha terraza na que goza do aire libre", explica a súa neta Nuria, que engade que pasa o día vendo a televisión, lendo e xogando ás cartas. "Deitase ás doce da noite e levántase ás dez e non consigo que se deite un pouco despois de comer porque di que despois o corpo acostúmase á cama", recoñece a súa neta, que subliña que "ten moi boa memoria e sabe moitos refráns e ás veces pasa ata media hora dicindo todos os que recorda".
Natural da parroquia mindoniense de Viloalle, Alicia trasladouse a vivir ao centro urbano de Mondoñedo ao contraer matrimonio con Jesús Oseira. Tivo tres fillas, unha das cales morreu moi nova, nove netos e cinco bisnetos. Toda a súa vida dedicouse á agricultura e a súa neta asegura que algo que sempre di ao referirse á súa mocidade é que "nunca volvan aqueles tempos, que eran moi duros".
