Unha avaría na central de telefonía da compañía R deixou durante varios días sen servizos a usuarios da localidade de Burela. A empresa desprazou este martes técnicos ata a vila burelense para tratar de liquidar a deficiencia detectada xa a finais da semana pasada.
O fallo nas liñas telefónicas levaba producíndose desde hai varios días, empezou como algo puntual e cada vez foi de maior calibre, aínda que se descoñecen os motivos que puideron provocar. A situación causou malestar e máis dun contratempo aos usuarios da compañía telefónica mencionada ao non poder desenvolver o seu traballo con normalidade.
Algúns usuarios da compañía recibiron como solución temporal por parte da empresa o desvío dos teléfonos fixos a outros aparellos móbiles coa finalidade de que puidesen seguir operando con certa normalidade e non perder os clientes.
A central de Camiño Real parece que funciona, segundo indicaron os técnicos tras comprobala, mentres que o problema detectouse na situada na rúa Rosalía de Castro.
O persoal desprazado pola empresa ata a localidade traballou durante todo este martes para tratar de dar solución aos afectados e que os sistemas de telecomunicacións volvesen recuperar o funcionamento normal.
