A ausencia do semáforo derrubado polo vento na madrugada do luns ao martes pasado sorprende os condutores que circulan pola avenida Arcadio Pardiñas de Burela, que no seu lugar atopan un cono sinalizando a incidencia. Afeitos A deterse, a falta do indicativo cáusalles certo asombro e cautela ao estar próximo a un cruzamento de dúas rúas, polo que optan pola precaución.
O vento que continuou na madrugada do martes ao mércores provocando a caída dun poste de telefonía en Porto de Arriba, pertencente a Vilaosende, no municipio de Ribadeo. Outro cable de telefonía veuse abaixo en Pousada (Lourenzá), municipio ao que os bombeiros de Barreiros tiveron que acudir para retirar unha árbore caída en Cazolga.
Protección Civil de Mondoñedo cortou e retirou outra árbore que interrompía a circulación na estrada que conecta Seivane con Tronceda.
ALERTA. Por outra banda, o Concello de Viveiro suspende de novo este mércores calquera actividade ou evento ao aire libre e pecha o parque Pernas Peón. A alcaldesa, María Loureiro, adopta esta decisión tras a alerta laranxa decretada pola Dirección Xeral de Emerxencias e Interior, con ventos que poden alcanzar os 100 quilómetros por hora.
