O primeiro fin de semana de agosto o municipio de Ribadeo experimentou un incremento de visitantes bastante notable en comparación co que fora un mes de xullo moi frouxo derivado da situación que provocou a pandemia da Covid-19. Case dun día para outro na primeira xornada de mes houbo un gran aumento de visitantes e isto fixo que de novo aflorase o problema da falta de aparcadoiros en diversos momentos e épocas do ano que vén afectando á vila ribadense, e iso a pesar das prazas habilitadas polo Concello.
Só uns días antes, a mediados de xullo, o alcalde anticipou a habilitación de 365 prazas de aparcadoiro distribuídas en distintos punto da vila ribadense.
Con todo unha das máis esperadas era unha zona que se atopa pegada ao aparcadoiro de Daniel Cortezón e que ata entón non fora máis que unha chea de silvas.
A zona limpouse e habilitouse, pero a obra quedou parada, co piso de pedra e aínda cos precintos municipais que a pechan e impiden a súa utilización por parte dos usuarios.
Nestes días en que a vila ribadense parece recuperar un fluxo de visitantes e turistas bastante parecido ao habitual ou, polo menos, superior ao que se podía esperar tendo en conta as circunstancias que rodean estes tempos, as colas de coches para aparcar continúan na localidade. Non hai moitas máis posibilidades para habilitar prazas de aparcadoiro no centro da localidade.
Agora xa parece remitir certa polémica xerada polo traslado do mercado semanal dos mércores ao aparcadoiro municipal tendo en conta que xa se sabe que non poderá volver á praza de abastos ao non poder cumprirse alí as distancias de seguridade.
