O organismo autonómico Augas de Galicia está a redactar nestes momentos o proxecto que define as actuacións que son necesarias para a mellora da rede de saneamento de Burela e prevé que esta redacción este finalizada ao longo deste primeiro semestre do ano. "A Xunta está a traballar no proxecto para mellorar e reforzar o sistema de saneamento do concello de Burela co fin de acadar uns servizos que dean resposta ás necesidades da poboación deste municipio", explican desde a Consellería de Infraestruturas e Mobilidade.
No marco deste proxecto está a definirse a posta en marcha de novos colectores xerais, unha estación de tratamento para o bombeo de augas residuais e a condución da vertedura desde a anterior estación de tratamento e da futura depuradora.
Por outra banda, Augas de Galicia segue avanzando nos trámites necesarios para licitar "proximamente" a redacción do proxecto para a construción da nova depuradora.
NECESIDADE. A mellora desta infraestrutura é un proxecto que se arrastra desde hai anos e sobre o que se deron varios prazos de inicio das obras e da finalización que nunca chegaron a cumprirse. Desde o Concello esperaban que as obras complementarias que son necesarias para mellorar a rede de saneamento empezasen xa a finais do ano pasado, con todo, aínda se dilatarán máis no tempo.
O propio alcalde, Alfredo Llano, recoñeceu en máis dunha ocasión que o proxecto da mellora do saneamento é unha obra moi complexa e custosa, pero urxe a súa consecución porque as actuais instalacións xa non cobren as necesidades da poboación burelense. En principio, a nova infraestrutura situarase nun solar á beira da rotonda do viario de acceso ao porto e contará cun tratamento biolóxico das augas.
Mentres a nova depuradora non chega, o Concello xa instalou hai uns anos unha segunda trituradora na actual para paliar o problema de desbordamentos que sofre, sobre todo, en episodios de choivas fortes e que afectan á zona do porto, sobre todo, ao náutico. Ademais, as obras de mellora que se realizan en distintas rúas -nestes momentos está en marcha a primeira fase da humanización de Rosalía de Castro- incorporan a separación de augas pluviais e residuais para aliviar a depuradora.
