Unha desgraza totalmente imprevisible que deixa consternación e tristeza na cidade, como sostén a alcaldesa de Viveiro, María Loureiro, ou unha canle sen limpar que puido influír na traxedia, como sinalan veciños de Xunqueira, á vista da gran cantidade de madeira e vexetación arrastradas. Son algunhas das valoracións en quente que se fixeron tras a traxedia que esnaquizou o barrio e na que non falta a versión do organismo da Xunta que identifica como de alto risco a zona.
A veciñanza, tal como recordaba Otero Regal, pedira reiteradamente a limpeza da canle tanto á Consellería de Medio Ambiente como ao Concello de Viveiro e Augas de Galicia, non observando ningunha mellora este ano.
Con todo, Augas de Galicia, ao fío dos datos recollidos por Meteogalicia, di que o sucedido se debe a unha "tromba de intensidade extraordinaria nunha bacía pequena sen capacidade para evacuar toda a auga caída", ante a cal, segundo a súa valoración, as limpezas dos ríos son só unha das posibles medidas que se poden tomar se se temen desbordamentos. De feito, recoñece que os seus técnicos estiveron pola zona en setembro, observando que a zona agora devastada "estaba en boas condicións, aínda que actuaron noutras de Viveiro nas que si se consideraba procedente, como foi nunha retirada de árbores caídos na canle do río Loureiro".
Di que ante tal cantidade de auga (en medida hora chegaron a caer alí 30 litros por metro cadrado) era imposible evitar a riada e empraza a investigar as posibles causas (presión urbanística, obstáculos , posibles desprendementos de terreos augas arriba...) entre as distintas administracións para mellorar a prevención e protección, aínda que recorda: "En todo caso, cómpre lembrar que lle corresponde aos concellos a limpeza dos treitos urbanos".
Non só colapsou este río Fontecova, tamén o Labrada, que atoró no lavadoiro. A Mariña viviu este verán outra tromba puntual, en Foz, que alcanzou A Rapadoira tras desbordar o canalizado Rego da Fonte, pero sen tantos danos.
