VIVEIRO. A alcaldesa de Viveiro, María Loureiro, e o edil de Mar, Jesús Fernández, reuníronse este martes en Santiago coa nova directora de Augas de Galicia, Teresa Gutiérrez, coa que abordaron un dos asuntos de máxima importancia para o municipio, as actuacións previstas polo ente público para mellorar o saneamento da ría. Foi un encontro positivo, apuntou a rexedora, xa que polo menos liquidouse un dos escollos, que era aclarar quen tería que retirar a parte non soterrada do emisario roto. Finalmente farao Augas, que espera «estar en condicións de licitar as obras en 2019».
Loureiro recorda que en abril do ano pasado Costas remitiu un informe ao departamento autonómico no que instaba a retirar o vello emisario á vez que se instalaba o novo. Entón Augas de Galicia solicitou ao Concello de Viveiro que asumise esa actuación, pero desde o ente local replicaron que non tiñan «capacidade nin medios» para executar a obra. «Xa falaron con Costas e chegaron a un acordo co que Augas vai retirar as partes máis superficiais do emisario antigo», apunta a alcaldesa. Desde a Consellería de Infraestruturas indicaron este martes que Augas asumirá a actuación «coa fin de desbloquear a tramitación dous permisos pendentes da Demarcación de Costas do Estado, que require a retirada do emisario existente condición indispensable para permitir a execución do novo».
Ademais da substitución do emisario roto que verte fronte ao porto de Celeiro por outro de 858 metros, o convenio asinado en setembro de 2016 entre Augas e o Concello por un importe de tres millóns de euros incluía a mellora da rede e conexión á depuradora do núcleo de Celeiro, varias actuacións de calado na propia Edar e un novo depósito de regulación «que permitirá unha mellor cestión das augas pluviais, evitando alivios contaminantes á ría en momento de choivas intensas», recordaron desde Infraestruturas.
A alcaldesa apuntou que a consellería traballa actualmente no estudo de impacto ambiental destas actuacións «e contan que a licitación sexa en 2019. Son trámites moi longos, pero o punto onde estaba parado xa vai para adiante e a directora mostrou a súa intención de avanzar co saneamento da ría», dixo.
PXOM. Loureiro e Fernández tamén se interesaron polo informe de Augas necesario para a aprobación do PXOM e que o Concello solicitou fai máis de dous anos.
A directora de Augas avanzou á alcaldesa un resumo das incidencias detectadas e que deben emendarse para poder obter o informe favorable e «nos próximos días» mandarán o requirimento de forma oficial ao Concello para que poida corrixilas.
