A Audiencia Provincial de Lugo absolveu o home acusado de violar a súa exparella en xullo de 2019 en Burela, tamén dos delitos de malos tratos que se lle imputaban, segundo recolle o fallo ao que tivo acceso Europa Press.
O tribunal non considera probado que o home abusase dela sexualmente e que usase a forza e recolle que no exame xinecolóxico e anatómico que realizaron á muller os facultativos non apreciaron "ningún signo de lesión".
Tampouco considera acreditada a existencia de malos tratos despois de que a exparella do home e denunciante afirmase que lle pegou nunha ocasión e que noutra a golpeara cun cinto. Tamén sostén que o relato da muller "se atopa carente de datos obxectivos que avalen o mesmo" e que hai "extremos que non apoian ou incluso contradin" o relato que ofreceu.
No xuízo, o home, un mariñeiro con residencia en Burela e de nacionalidade de Cabo Verde, alegou que as relacións sexuais foron "consentidas" e que foi ela quen o bicou. No xuízo, a defensa, exercida polo letrado Rubén Veiga, sostivo que podería tratarse dunha "denuncia falsa".
Tras coñecer o fallo, o avogado expresou a súa satisfacción pola sentenza absolutoria, petición que formulou no xuízo. A Fiscalía solicitaba dez anos de cárcere por un delito de agresión sexual e outros nove meses por malos tratos, igual que a acusación particular.
