A profesora de ioga burelense Susana López Otero abrirá nuns días o seu propio negocio, algo que ansiaba e ao que se animou pola pandemia para poder acoller a unha decena de persoas á vez con todas as medidas de seguridade e é que o covid-19 entrou ata nas mentes máis afeitas a relaxarse. Algo que ela insignia desde hai anos e que nuns poucos días fará desde o seu novo local en Foz.
Un centro, que nace co nome de Surya Ioga & Pilates, escollido porque surya en hinduismo é o sol e cada clase de ioga comeza cunha serie de posturas (asanas) de saúdos ao sol, recorda López Otero, que coñeceu o ioga na universidade e o seu primeiro curso foi para nenos.
Aos poucos foise convertendo na súa filosofía de vida e o atraso na convocatoria das oposicións para profesor, que parecía un escollo na súa vida, converteuse no seu mellor aliado para formarse. Ao seu primeiro curso para instrutor en Málaga sumou un segundo como profesor na Escola Internacional de Ioga, en Madrid, e un Máster Internacional en Zaragoza, aínda que no medio veu a súa experiencia máis intensa coa súa formación na India, na Yogadarshanam Teacher Trainings School, en Mysore. Unha formación que foi tamén unha lección de vida, con semanas de convivencia con xente chegada de diversos países, "de Arabia Saudita, Irán, Líbano, Canadá, Alemaña...", recorda.
Nas súas clases, Susana transmite a necesidade de xerar "conciencia dun mesmo", de axudar a equilibrar corpo e mente. "Obrígache a parar e é algo ao que non estamos afeitos e incluso te sentes mal sen facer nada e co ioga estás só contigo mesmo, permitíndoche o estar, que é do que se trata, de xerar ese espazo por dentro", di. Unha disciplina para persoas de todas as idades e condicións físicas, porque imparte tamén a modalidade de restaurativo e ao que suma pilates de chan e con implementos.
No local haberá unha tenda, con camisetas de algodón orgánico e serigrafía ecolóxica da firma lucense Cinco Soños, de éa tamén o logo e os cadros.
