Unha das obras máis demandadas polos ribadenses, a conexión a pé con máis seguridade desde a vila á área comercial do Vilar, nos arredores, estará realizada este inverno. O alcalde, o nacionalista Fernando Suárez, anunciou que os traballos de humanización desta contorna comezaron e terminarán en novembro, grazas a un investimento moi elevado, de máis de 380.000 euros, cofinanciada coa Deputación Provincial de Lugo.
Trátase dunha das entradas antigas pola N-634 máis coñecidas para entrar en Ribadeo desde de Lugo. Agora é unha zona infestada de grandes hipermercados, talleres e outros negocios. Por mor dunha petición formulada polo Concello a Fomento, o ministerio cedeulla aos ribadenses hai uns anos e o lugar pasou en 2013 a formar parte da trama urbana municipal baixo a denominación Avenida Ría de Ribadeo
Para o alcalde, a humanización desta entrada á vila é unha das obras máis importantes de Ribadeo: "Foi un dos dous accesos á vila, polo que transcorría unha estrada convencional que era de paso case exclusivo de vehículos rodados e na que actualmente conviven viandantes e vehíuclos. Isto é o que provoca perigo de accidentes, porque non está adaptado o espazo a unha zona máis humana e urbana".
E ese é o obxectivo da actuación: reformar esta avenida e conectala de forma máis adecuada co centro urbano "para que todos os veciños poidan acodir con seguridade andando a todos estes establecementos comerciais que hai, porque no Vilar concéntranse unha chea de actividades comerciais".
O rexedor recoñece que actualmente as superficies comerciais non dispoñen duns accesos idóneos tanto para peóns, como para vehículos. "Como se trata dun solo urbano consolidado, debemos acometer estes traballos de humanización", matiza o concelleiro.
Construiranse beirarrúas e pasos elevados; a vía contará cunha nova iluminación e soterrarase o tendido de media tensión
ACTUACIÓNS. A actuación contempla a construción de beirarrúas —había unhas, polas que tamén van os ciclistas, pero se completarán e mellorarán as actuais—; colocaranse pasos elevados, porque aínda que hai limitacións de velocidade convén extremar a precaución polos viandantes. Outra das reclamacións que se formularon por exemplo por parte do PP como a mellora da iluminación tamén se fará, ademais de aplicar unha nova capa de rodaxe e soterrar o cableado de media tensión. As árbores e o mobiliario contribuirán á súa urbanización e embelecemento. A empresa Sergonsa, con sede na Coruña, executará os traballos.
Instan a reparar xogos do parque infantil de Rinlo
Xardinería
A agrupación municipal socialista insta á súa vez ao goberno municipal a cortar as malas herbas das xardineiras con arboledo decorativo da vila. Segundo o PSOE local, a poucos días das festas, o abandono destes elementos decorativos "da mala imaxe".
255.000 euros
Son os anunciados polo BNG para reparar varios municipais. O PP confía en que "estes cartos non sexan só para os rebacheos que se están vendo nas parroquias, senón que sirvan para aglomerar".