O taller de Regal Cerámica é lugar de formación para aprendices de artesanía bolseiras pola Xunta que durante un ano amplían os seus coñecementos e habilidades nunha empresa de referencia como é a asentada en Xunqueira. Lida Amador e Carmen Soriano, ambas as madrileñas, móstranse encantadas coa experiencia e apuntan que están "a aprender moitísimo, que é o máis importante".
Lida Amador é de Leganés e ten 31 anos, dos que os dez últimos viviu en Galicia. "Estudei Belas Artes, estiven un ano en Pontevedra, despois na Coruña e agora vinme a Viveiro. Decateime de que había unha axuda para os artesáns, documenteime para ver onde quería entrar e este era un dos sitios que me apetecía, porque me especialicei en debuxo e en escultura", conta a moza, a quen lle gusta moito modelar e todo o que ten que ver co volume".
"Aquí resulta imposible aburrirse porque sempre hai unha chea de cousas que facer"
A aprendiz incorporouse ao taller en outubro, onde coñece "todos os procesos cerámicos", unha formación que pretende aproveitar no futuro e tal vez algún día crear o seu propio taller. "Vexo que se me abriu o mundo da cerámica e espero continuar esta liña", comenta. En Regal realiza distintas tarefas e indica que lle gusta facer de todo, "ata retocar pezas resulta entretido porque non deixa de ser traballar en volume. Gústanme todos os procesos e aquí é imposible aburrirse porque hai unha chea de cousas que facer sempre", relata.
Xunto a ela traballa desde maio Carmen Soriano, de 32 anos e de Madrid, pero que leva tamén nove anos na Coruña. Coñeceu a oportunidade de acceder a esta bolsa a través de Lida, que xa estaba a se formar desde uns meses antes no taller vivariense. "Eu a Regal non o coñecía, coñecino por vir aquí", recoñece a aprendiz, quen resalta que lle gusta todo o proceso de creación das pezas e en especial o equipo humano, con 13 traballadores. "O que máis me chamou a atención foi Afonso (Otero Regal), creo que é o máis admirable que hai aquí e todas as traballadoras, que son un equipazo", afirma.
Carmen Soriano é "arquitecta de interiores, ilustradora e restauradora tanto de mobles como de edificios". "Fago estucos, como os venecianos para as igrexas, pero eu fago liñas de moble con iso e interesábame moito estar nun taller e ver, á parte da cerámica, como montou Afonso todo isto que é impresionante", relata.
A aprendiz asegura que goza e aprende de cada unha das tarefas que realiza, "desde facer un molde aos ferros, lijar, pegar, esmaltar, serigrafiar, xoiería, sedas...", di, para recordar que Regal acaba de incorporar este material e as dúas estiveron "a pintar sedas tamén".
O titular, Afonso Otero Regal, tamén se mostra moi satisfeito pola experiencia e recorda que estas bolsas de formación que concede a Xunta son para titulados en Belas Artes na universidade ou escolas de oficios. Hai pouco terminou a súa formación outra pupila, Alicia Muñiz, e proximamente incorporarase unha máis.
