A Xunta de Galicia, a través do seu delegado territorial en Lugo, José Manuel Balseiro, e a alcaldesa de Trabada, a socialista Mayra García, enfrontáronse á mantenta da achega autonómica á rehabilitación dunha vivenda en Sante que se dará a familias con escasos recursos que se mudan a este municipio e así contribúen a fixar poboación e manter aberta a aula de infantil no colexio. Balseiro quixo pór en valor a achega do Executivo autonómico a esta obra, que foi de 26.300 euros, pero Mayra García reprochoulle unha cifra que non considera o suficientemente comprometida, xa que lle reclamou 35.300 euros.
O responsable autonómico insistiu en que este proxecto en Trabada foi un dos beneficiados polas axudas da Xunta para rehabilitar edificios en contornas rurais. Citou os traballos realizados, que foron de rehabilitación practicamente integral dun inmoble moi deteriorado e certificou "o bo resultado dunha obra que ofrece unha segunda vida a inmobles que se atopaban en desuso ou directamente en situación de abandono".
DESCONTO. A rexedora trabadense queixouse de que para este proxecto, cun importe total de 47.500 euros, solicitou 35.300 á Xunta, que acabou achegando 26.300 e, o resto, o Concello, "o que supón un 55% de achega da Xunta e un 45% do Concello, sen ter en conta o equipamento, que non estaba incluído no proxecto". Cre que isto pon de manifesto "o esforzo que fai o Concello para manter o seu patrimonio e ao mesmo tempo dar utilidade ós inmobles e dotarse de máis recursos que poñer a disposición de quen máis o necesita. Non se pode comparar a capacidade económica da Xunta cun orzamento de 9.850 millóns de euros fronte aos 1,6 millóns de euros, co que conta o Concello de Trabada".
Á marxe de visitar a vivenda, a alcaldesa aproveitou a presenza do delegado da Xunta para pedirlle a súa colaboración para realizar o equipamento das escolas rurais que o Concello rehabilitou "e así poder continuar co proxecto iniciado".
