A gandería Balseiro de Budián, no municipio do Valadouro, perdeu na madrugada do domingo ao luns pasado tres ovellas presuntamente atacadas polo lobo ou algún tipo de cánido. O propietario non se aventura a dicir con certeza que depredador puido acabar coa vida das súas reses.
O ataque produciuse dentro dun pasto pechado con malla, que está próximo a unha casa do gandeiro, quen cre que debeu ocorrer de noite, xa que el acudiu a alimentalas o domingo cara á unha e media da tarde e posteriormente víronas no prado outros veciños que residen na zona. "Do pasto ás casas onde apareceron mortas as ovellas hai uns 100 metros" de distancia, segundo o gandeiro.
O afectado manifestou a este xornal a súa intención dedenunciar os feitos ante a Consellería de Medio Rural, para que os seus técnicos poidan certificar que tipo de animal puido ser o autor do ataque ás súas ovellas. Esa denuncia tamén lle serve para reclamar unha posible indemnización á que poida ter dereito.
O gandeiro expresa o seu estrañeza polo lugar onde se produciu o ataque, que está nunha área próxima a vivendas, dado que na zona desapareceron animais -tenreiros, cabras e ovellas- antes, pero nunca pasou cos que se atopaban tan preto das casas. O habitual é que falten en zonas máis altas, "nos montes si que matan, pero non tan abaixo", indica. Nos arredores non quedan demasiadas explotacións, segundo este gandeiro.
