Aínda que o Pescados Rubén Burela feminino se atopa aínda inmerso en plena competición, a dirección técnica da entidade mariñá non está cos brazos cruzados e xa empezou a planificar semanas atrás a próxima tempada.
O conxunto burelista moveuse ben no mercado para rexuvenecer o seu persoal con futbolistas internacionais en previsión das numerosas baixas que se perfilan no persoal laranxa.
Se nada se torce, a galega Antía Pérez, da Sala Zaragoza, e a meta andaluza Caridad García, procedente do Poio Pescamar, incorporaranse este verán á disciplina do conxunto mariñán.
Antía Pérez (Vigo, 2000) é unha prometedora á-pivote criada na canteira do Ourense Envialia á que dúas lesións graves de xeonllo cortáronlle a súa progresión. A primeira sufriuna no cruzado anterior da articulación esquerda en outubro do 2018, cando disputa en Buenos Aires o partido polo bronce dos Xogos Olímpicos da Mocidade coa selección española Sub-18. A segunda, xusto un ano despois mentres adestraba co Poio Pescamar, afectoulle ao cruzado anterior do seu xeonllo dereito e viño acompañada dunha pequena fractura na meseta tibial. Tras recuperarse satisfactoriamente, ao final da pasada tempada tamén se temeu por unha nova lesión grave no xeonllo dereito, pero finalmente quedou nunha escordadura de ligamento interno e edema óseo.
Logo de tres campañas no Poio Pescamar asinou o pasado ano polo Sala Zaragoza, con quen logrou a permanencia no último partido. Este curso tivo máis continuidade que nas tempadas anteriores e en maio debutou nunha convocatoria da selección absoluta. Cumprirá 22 anos a próxima semana e é un portento físico para xogar no pivote que destaca pola súa perseveranza e mentalidade de ferro.
Mentres, Caridad Garcia (Sanlúcar de Barrameda, 1999) soprará 23 velas en xullo e é unha gardameta que destaca pola súa rapidez, os seus reflexos baixo paus e por ter un bo un contra un.
Caridade criouse na canteira do Cádiz FSF e debutou en Primeira co Guadalcacín xerezano. No verán do 2019 recalou no Poio Pescamar, elástica que defendeu nas últimas tres tempadas. Nas dúas primeiras compartiu equipo coa tamén internacional Silvia Aguete, polo que formaban a mellor portería da Primeira División.
Con 20 anos debutou na selección absoluta española e foi unha asidua nas convocatorias de strong Clàudia Pons, aínda que nesta última campaña perdeu algo de protagonismo.
