O presidente da Autoridade Portuaria de Ferrol-San Cibrao, Indalecio Seijo, e varios cargos da entidade reuníronse en Celeiro co delegado territorial da Xunta en Lugo, Javier Arias e co xefe territorial da Consellería de Mar, Pablo Fernández Asensio no primeiro encontro institucional na comarca desde que Seijo tomou posesión do cargo. Este ofreceulles a máxima colaboración e sobre a mesa avanzáronse asuntos como un maior aproveitamento do porto de San Cibrao máis aló do 2027, cando termina a actual concesión a Alúmina, ou posibles usos alternativos de instalacións dos faros.
Sobre o porto que agora xestiona en exclusiva Alcoa, Seijo dixo que o conflito de Aluminio apenas se notou nos tráficos dado que este depende de Alúmina e move sobre todo bauxita e alúmina. "Alúmina estivo a pleno rendemento pero todo o ciclo fai forte o porto", matizou. Os alcaldes de Xove, Demetrio Salgueiro, e de Cervo, Alfonso Villares, que á súa vez se rotan como representantes no consello da Autoridade Portuaria, tamén expuxeron demandas nunha reunión na que estiveron ademais Alejandro Rei, director do organismo de Ferrol-San Cibrao e Julio Hernández, xefe do departamento comercial e de desenvolvemento.
FEVE. Por outra banda, Adif anunciou este xoves un contrato de 2,9 millóns para mellorar a capacidade da liña entre Ferrol e Ortigueira.
