Alcoa e os sindicatos da fábrica de Cervo están chamados este xoves a un acto de conciliación previo ao xuízo pola demanda contra o despedimento colectivo que afecta a 524 traballadores da planta de aluminio da Mariña de Lugo. A sala do social do Tribunal Superior de Xustiza de Galicia (TSXG) fixou o xuízo para as 9.30 horas deste xoves, e as partes foron citadas antes, ás 9.15 horas, ao acto de conciliación.
O comité de empresa confía en que da conciliación poida saír "algo novo" con respecto á actitude que mantén a multinacional desde hai meses. Pola súa banda, fontes da compañía consultadas por Europa Press evitan "especular" co que limitan a unha "hipótese", que sería chegar a ese acordo que evitase o xuízo.
En caso de non avinza, o acto de xuízo comezará ás 9.30 horas. A empresa insiste en que "o despedimento colectivo é necesario por mor dos factores estruturais permanentes que impactan na planta de aluminio de San Cibrao, que fixeron que non sexa competitiva". Defende, en contra do que denuncian traballadores, Goberno e Xunta, que actuou "de boa fe e de acordo coas normativas aplicables no proceso de despedimento colectivo".
E engade que "priorizou o diálogo, realizando grandes esforzos desde o pasado mes de maio para chegar ao mellor acordo cos representantes dos traballadores ante unha situación insostible", pero advirte de que "todas as ofertas foron rexeitadas".
Pola súa banda, os sindicatos con representación no comité de empresa, que preside CC OO, basean a súa posición, precisamente, na denuncia de "mala fe" por parte de Alcoa, á que acusan de non negociar durante o período de consultas do despedimento colectivo. Confían, por iso, en que os maxistrados lles dean a razón e o declaren nulo, segundo advertiu a avogada de Comisións María Veiga este martes en declaracións a Europa Press, posto que existen precedentes de expedientes que foron tombados pola xustiza por esa "falta de negociación".
Ademais, aseguran que as causas estruturais ás que apela a firma non existen, posto que a demanda de aluminio está á alza, asegura o comité, e o prezo da electricidade é o máis baixo dos últimos anos.
Tras un longo proceso de negociación, Alcoa rexeitou vender a factoría a Liberty House primeiro e á sociedade estatal de participacións industriais (Sepi) despois. Os despedimentos aínda non foron comunicados aos empregados, á espera do que determine o TSXG, que en días pasados impediu á empresa parar as cubas de electrolisis, precisamente, para dar garantías a unha eventual reincorporación dos traballadores no caso de que o Ere sexa declarado nulo.
DEMANDA POR AVILÉS E A CORUÑA. Por outra banda, Alcoa interpuxo unha demanda, segundo indica, o pasado verán, relacionada coa venda das plantas de Avilés e A Coruña ao Grupo Parter Capital en xullo de 2019. O acordo de venda das accións das dúas compañías "incluía determinadas obrigacións" que Alcoa cre que Parter "incumpriu", polo que solicita ao tribunal "que confirme que así é".
"A venda de Avilés e A Coruña a Parter realizouse mediante un proceso de venda transparente, coñecido polos sindicatos e supervisado polo Goberno", afirma a multinacional.
Pola súa banda, o portavoz dos traballadores de Alui Ibérica na Coruña, Juan Carlos Corbacho, critica que "quen elixe a Parter é Alcoa" e cre que a empresa "pretende lavarse as mans" cando "é clara culpable" da situación que afrontan ambas as fábricas. "Precocinou todo o que está a pasar, incluso a chegada de Grupo Risco (actual propietario). Aquí non se dá puntada sen fío", resolve este representante, que asegura que os novos donos están "a baleirar a planta".
