A reunión entre a dirección de Alcoa España e o comité da súa factoría de San Cibrao, celebrada este xoves en Lugo, non rexistrou ningún avance. Os representantes da multinacional xustificaron a súa postura sobre o peche da planta de aluminio e os 534 despedimentos en base a causas estruturais como un marco enerxético prexudicial e a sobreprodución no mercado internacional, "que presiona os prezos á baixa", sinalaron fontes da empresa.
Os sindicatos, mentres, apelan ás negociacións na mesa multilateral, con presenza do Goberno e a Xunta, e avogan pola intervención da fábrica tras o silencio dos directivos ante as reiteradas preguntas sobre se Alcoa tiña interese en manter a única planta de aluminio primario de España.
"A situación é insostible a causa do aumento da capacidade de produción de China nos últimos anos, que alcanza o 60% do total mundial, e do prezo da enerxía eléctrica en España, que fai inviable a produción de aluminio primario", asegurou unha portavoz da firma alumineira.
A reunión parecía abocada ao fracaso de antemán. A multinacional non modificou a súa posición e os sindicatos negáronse a falar de despedimentos e defenderon que o conflito debe solucionarse na mesa multilateral creada en xaneiro. O secretario xeral do Ministerio de Industria, Raül Branco, convocouna para o martes próximo.
O comité tamén mantivo este xoves unha reunión telemática co conselleiro de Economía, Francico Conde, na que pediu á Xunta que faga unha fronte común" co Goberno central en defensa do emprego.
► Toda a información, na edición impresa de El Progreso deste venres
