O encontro mantido a mañá deste mércores entre a dirección de Alcoa en España e o comité de empresa da factoría de San Cibrao volveu resolverse sen ningún avance. A empresa convocou de novo aos traballadores para a próxima semana, o luns, o martes e o mércores, en Lugo. Desta forma esgotaríanse as tres semanas previstas dentro do período de consulta informal exposto pola empresa o pasado 28 de maio como paso previo ao despedimento previsto de 534 traballadores.
Alcoa insiste en que son necesarias "medidas urxentes e necesarias" e volveu incidir en que "os problemas estruturais inclúen a produtividade e as ineficiencias da organización que expoñen perdas económicas insostibles". "Eses problemas estruturais, combinados co exceso de capacidade global de aluminio, os custos de enerxía non competitivos e os baixos prezos do aluminio, causaron perdas financeiras significativas nos últimos dous anos, que se espera que continúen", explican nun comunicado.
Fontes da empresa explican que son conscientes do "impacto social e humano deste anuncio" e volveu incidir en que non se tomou ningunha decisión e non se tomará ata que finalicen as consultas"
Alcoa agradece o apoio dos empregados e os gobernos centrais e rexionais nestes últimos anos para intentar superar os problemas da planta de aluminio.
