A dirección de Alcoa convocou ao comité de empresa do complexo industrial de San Cibrao a unha reunión, que terá lugar o próximo mércores día 28, en resposta á solicitude formulada pola representación dos traballadores para falar, entre outros temas, da situación e do futuro do plan de produción de alúmina.
Segundo informou o propio comité, esa reunión terá lugar en Madrid, de forma presencial, o próximo 28 de setembro, a partir das 12:30 horas. á espera de coñecer máis detalles dese encontro, asistirá á reunión un máximo de dous membros do comité de empresa por cada sindicato con representación no mesmo.
En canto á situación da planta de alúmina, cuxa produción se viu reducida como consecuencia do elevado prezo do gas, o presidente do comité, José Antonio Zan, confía en que sexa unha reunión "ao máis alto nivel" para falar sobre o futuro da mesma.
En todo caso, deixou claro que "o comité de empresa en ningún momento aceptou falar dun ERTE", ao que se opón de forma rotunda. "Cremos que non debe darse, que non debe negociarse nada nese aspecto, porque é ilóxico", dixo o presidente do comité.
De feito, José Antonio Zan opina que hai que falar de solucións "a futuro" para a planta de alúmina, con investimentos "" que garantan a súa rendibilidade. "Non existe razón algunha para negociar un ERTE", insistiu.
