Alcoa comunica por carta aos traballadores que a planta de San Cibrao "non é viable"

O presidente en España da multinacional Alcoa, Álvaro Dorado, remitiu unha carta aos traballadores da planta de aluminio de San Cibrao explicando que prevé reestruturar a actividade na fábrica porque "non é viable, debido a ineficiencias produtivas que expoñen unha situación económica insostible".

Dorado afirma na que carta que "as circunstancias que afectan á planta de aluminio de San Cibrao fan que non sexa competitiva e, como resultado, débense tomar medidas urxentes".

Subliña que esa factoría situada na comarca da Mariña arrastra "problemas estruturais intrínsecos" e afronta "dificultades económicas permanentes".

O directivo di que "Alcoa é consciente do impacto deste anuncio nos empregados", polo que asegura o seu desexo de optar por abrir "un período de consulta informal durante aproximadamente tres semanas para proporcionar o tempo adecuado para explicar en detalle a situación actual, os seus motivos e para discutir alternativas e medidas".

Sinala que os motivos desa decisión radican expresamente "problemas estruturais", como "os altos custos de enerxía e o baixo prezo do aluminio que, xunto co exceso de capacidade global, causaron significativas perdas recorrentes, que se prevé que continúen".

Precisa, así mesmo, que "estes factores existían antes da crise da Covid-19 e espérase que continúen logo da crise sanitaria".

Tamén asegura que Alcoa é consciente do "potencial impacto destas medidas" e que, na medida do posible, intentará "minimizalo" mediante un "proceso de consulta cos representantes dos traballadores".

Nese sentido, asegura que "non se tomou ningunha decisión nin se tomará ata que finalicen as consultas".