O proxecto do Goberno Central para incluír ao lobo no catálogo de especies de especial protección choca co mantemento da gandería extensiva en zonas como Serra do Xistral, motivo polo que os alcaldes dos municipios que conforman esta contorna natural piden un adiamento na toma de decisións relativas ao lobo ibérico e a apertura dun diálogo cos sectores afectados, xa que consideran "que non é efectiva, xusta nin apropiada" a publicación dunha norma xenérica que deixe de lado particularidades como as que se dan nesta zona da provincia.
Unha petición á que suman a realización de estudos técnicos para lograr o equilibrio natural de ecosistemas como o que existe no Xistral, pois "entendemos que o lobo é só un habitante máis da súa contorna. Non é o único problema nin a única solución".
Os rexedores municipais de Abadín, Alfoz, Cervo, Muras, Ourol, O Valadouro, Viveiro, Xermade e Xove recordan a particularidade dunha zona "que é un ente único, onde están localizadas o noventa por cento das turberas de cobertura de toda Europa" cuxa conservación, afirman, depende en boa medida da gandería extensiva, sobre todo dos cabalos que viven na zona en réxime de semilibertad e que axudan a manter limpos os montes practicando unha roza natural.
Unha forma de vida tradicional que ven agora perigar pola decisión de moitos gandeiros de abandonar debido ao incremento dos ataques dos lobos ao gando, que aumentaron considerablemente e que temen que vaian a máis coa protección do depredador. Como exemplo, aseveran que dos 237 avisos de ataques en 2013 pasouse o pasado ano ao milleiro "por exceso poboacional do lobo". "Un desequilibro", din, que aboca "á actividade gandeira ao abandono".
Por iso, piden que dita actividade sexa recoñecida como "económica e patrimonial a protexer", para o que propoñen a dotación dos recursos para frear o seu declive e propiciar a súa recuperación nas próximas décadas.
