Alcaldes e candidatos á alcaldía dos municipios da comarca lucense da Mariña acordaron enviar un manifesto á Xunta de Galicia para solicitar a paralización "inmediata" do novo contrato para o servizo de transporte sanitario.
A decisión foi adoptada logo da reunión que mantiveron os rexedores socialistas e o secretario xeral do PSdeG na provincia de Lugo, Álvaro Santos, con traballadores do 061 no centro de Saúde de Foz.
Os socialistas recordan que ese contrato contempla a supresión dunha praza de técnico de urxencias sanitarias para a ambulancia medicalizada de Foz, que dá servizo a veciños de toda a comarca.
Ademais, destacan que a de Foz será a única das dez distribuídas por toda Galicia á que se lle recorta persoal co novo contrato.
O manifesto foi remitido este martes Consellería de Sanidade e á xerencia do Sergas, coa firma dos oito alcaldes do PSdeG na Mariña, que expresan o seu "máis severo reproche a este inaceptable recorte".
