A continuidade ou non de Fernando Suárez á fronte dunha candidatura das eleccións municipais segue sendo unha incógnita que a moitos lles interesa moitísimo despexar. Non é para menos. Foi primeiro tenente de alcalde de 2003 a 2007 e desde entón ocupa a alcaldía cunha progresión ascendente de votantes nunca vista no Bloque Nacionalista Galego na Mariña.
Con todo, hai xa tempo que deixou moi claras as súas desavinzas coa deriva interna do BNG, chegou a anunciar hai un tempo ao seu círculo próximo que o deixaba, pero iso foi hai xa tempo e no punto máis álxido do seu enfrontamento coa dirección do Bloque que o levaría a formar unha especie de alianza cun bo grupo de alcaldes dese partido críticos coa liña oficial.
O luns Suárez Barcia reencontrouse con varios deles en Santiago e un deles, Xurxo Rodríguez, publicou un artigo que logo compartiu o rexedor ribadense no que sen falar explicitamente lense frases como "algún día han de converxer de novo os nosos pasos, e de moitos máis ca nós. Cando moitos camiñan cara o mesmo destino sempre encontran o xeito de facer a viaxe xuntos, seguindo o mesmo rumbo para chegar decontado". Tamén anticipa frases como "atoparémonos de novo" que este martes aplaudiu o alcalde ribadense, que polo momento continúa co seu traballo case coma se non faltasen seis meses para as eleccións municipais.
Preguntado por esta circunstancia, Suárez Barcia volveu á súa senda habitual ao pronunciarse sobre este asunto: "Non digo nada. Sigo sen dicir nada e non quero dicir nada ao respecto ata que chegue o momento de facelo".
O que non pode evitar son os múltiples rumores respecto diso que se producen e que ademais nas últimas semanas están a acelerarse de forma notable pola inevitable circunstancia de que cada vez falta menos para a cita coas urnas e, polo tanto, a marxe de manobra para que o Bloque configure a lista e, sobre todo, atope un cabeza de lista que o substitúa se decide non continuar redúcese de forma moi rápida. Precisamente iso é o que fai que a maior parte dos partidos cos que compite, basicamente PP e PSOE en Ribadeo, estean convencidos de que repetirá á fronte dunha candidatura.
Non tardará moito en saberse.
