O alcalde de Burela, Alfredo Llano, manterá un encontro o vindeiro venres con representantes da empresa Norueguesa que está interesada en pór en marcha na localidade unha planta de cativa de salmón. Segundo avanzou Llano as instalacións estarían previstas para o polígono do Berbés, no porto da localidade, un espazo que xa no seu día foi pensado para albergar empresas vinculadas ao mar. "É unha empresa que ten uns obxectivos claros e que permitiría mellorar a situación laboral no concello", asegurou o rexedor.
"Hai moi bo entendemento con esta empresa e creo que ten unha gran intención de implantarse no noso concello, pero hai que mirar todo o que pretende e a ver como se poden ir dando os pasos para que isto se vaia concretando", engadiu o rexedor, que avanzou que o encontro servirá para falar das características que terá a empresa ou as necesidades das instalacións, entre outras cuestións. "Imos analizar todo isto, porque estamos interesados en favorecer que veña esta empresa e outras", subliñou. "Trataremos de facilitar todo o posible a instalación de empresas para mellorar a produción e a situación laboral, que interesa moito nos temos que estamos", engadiu.
Polas primeiras informacións que transcenderon respecto diso deste proxecto, e que este xornal avanzou a mediados de agosto, a iniciativa aínda está en fase de estudo e un dos principais escollos cos que contaría será a gran cantidade de auga doce que é necesaria para o funcionamento das instalacións.
