Unha das usuarias do centro viveirense de Aspanane Alba Fernández Jiménez espera nerviosa a que chegue este domingo, xornada na que votará por segunda vez, xa que só puido facelo en nunha ocasión ao cumprir a maioría de idade. Agora, dúas décadas despois enfróntase emocionada ao feito de poder elixir ao presidente do Goberno de España e aos representantes do Senado, algo polo que leva moito tempo loitando, pois "non entendía porque uns podían votar e outros non". Para ela, nunhas horas terminarase cunha "inxustiza" de anos, polo que se mostra "absolutamente feliz".
As gañas de poder seguir os pasos dos seus compañeiros levárona a vivir o simulacro con tanta intensidade que "realmente emocioneime moito", pois "foi un momento moi forte para min que levo moito pedindo votar, xa que era tremendamente inxusto que uns poideran facelo e outros non e alí con todos os compañeiros rompín a chorar", asevera.
"O certo é que choramos todos", din varios dos usuarios que compartiron xornada con ela, recordando o momento vivido na casa consistorial, onde se reproduciron as condicións dun colexio electoral, que serán reais este domingo.
Unha cita que Alba espera feliz. "Xa me chegou a tarxeta censal e teño que ir votar no conservatorio", explica, mentres conta que aínda non decidiu se irá soa ou acompañada, aínda que practicamente decántase por esta segunda opción, pois "creo que como é a primeira vez prefiro ir con alguén", sinala, ao tempo que non se cansa de dar as grazas "a todos os que pelexaron porque xente coma a min poida volver votar".
Non é a única á que a emoción desbordouna ao sentirse parte da comunidade que participa nas decisións do seu país, pois o seu compañeiro Jesús Blanco, de 52 anos, sincérase contando que "chorei cando me vin no censo electoral".
