Un home afronta unha pena de dous anos e nove meses de cárcere que lle solicita a Fiscalía por ser o presunto autor de senllos delitos de ameazas graves e un quebrantamento de condena. O acusado tiña unha orde de afastamento do seu pai pola que non podía aproximarse a cen metros del nin da súa casa.
Os feitos producíronse o pasado 23 de marzo, cando o acusado se dirixiu a casa do seu pai sobre as cinco e media da tarde e, tras entrar na vivenda, foi ao seu dormitorio e comezou a ameazalo con frases como "Voute matar", "Vouche pegar un tiro", "Cando marchen vos gardas voulle prender lume á casa contigo dentro" ou ameazándolle tamén con queimarlle o coche.
PETICIóNS. Agora, desde o Ministerio Fiscal reclámase unha condena dun ano de prisión polo quebrantamento de condena e 21 meses máis polo delito de ameazas graves, ademais do pago das costas do xuízo.
Como pena accesoria, desde a Fiscalía engaden que se lle prohiba achegarse a calquera lugar onde se atope o seu pai, xa sexa o seu domicilio, o seu lugar de traballo ou calquera outro lugar frecuentado polo mesmo nun radio de cen metros, así como comunicarse con el por calquera medio co fin de tratar de evitar que volva suceder algo como o agora xulgado.
