Un home afronta unha pena de catro anos e medio de prisión e multa de 788,16 euros, con responsabilidade subsidiaria en caso de falta de pagamento, por un delito de tráfico ilícito de sustancias estupefacientes que non causan grave dano á saúde, en concreto por tratar de facilitar haxix a un grupo a alumnos dun instituto de Viveiro, segundo indica o escrito do ministerio fiscal. O xuízo será o venres no Xulgado do Penal número 1 de Lugo.
Os feitos ocorreron no parque Pernas Peón no tempo de recreo, cando o acusado, sen antecedentes penais, acudiu o 27 de abril de 2017 cara ás once e cuarto da mañá ao parque Pernas Peón coa intención de atoparse cos mozos, varios deles menores de idade, como xa fixera o día anterior con outro menor, ao cal cobrara 5 euros por unha pequena cantidade da citada sustancia.
O acusado dirixiuse a unha máquina expendedora de bebidas, en cuxa parte traseira ocultara unha bolsita con pequenas cantidades de haxix e tomou un pouco dispóndose a lear un porro xunto cos menores, momento en que foi detido.
Os axentes interviñéronlle 31,68 gramos de resina de cannabis (haxix), que o acusado proxectaba destinar á ilícita distribución a terceiros. Esta cantidade da sustancia alcanzase un prezo de 197,04 euros no mercado ilícito. Trátase dunha sustancia incluída nas listas primeira e cuarta da Convención Única de 1961. A cantidade de droga incautada foi comisada e remitida ao depósito para a súa destrución, que agora se pide.
