Un total de 27 persoas afectadas coa enfermidade de alzhéimer da comarca mariñá son atendidas diariamente pola Asociación de Familiares de Alzhéimer (Afa) de Viveiro. A deputada de promoción económica e social, Sonsoles López Izquierdo, mantivo un encontro este domingo cos usuarios deste centro para coñecer as necesidades ás que se enfrontan diariamente tanto os que padecen esta enfermidade neurodexenerativa como os seus familiares.
A Deputación de Lugo colabora con este colectivo a través dun programa de estimulación e mantemento cognitivo destes pacientes. As persoas que sofren esta enfermidade son atendidas por persoal cualificado e profesionais como traballadores e educadores sociais, terapeutas ocupacionais, fisioterapeutas, psicólogos, expertos en nutrición, no desenvolvemento psicomotor e auxiliares de enfermería, entre outros.
En Afa Viveiro tratan aos pacientes con medios especializados en exercitar a memoria, como a aprendizaxe das regras nemotécnicas, exercicios visuais e auditivos, sudokus, actividades de cálculo mental, orientación especial e temporal e xogos de palabras e exercicios de narración no que respecta á linguaxe.
CENSO NON OFICIAL. Non existe un censo oficial dos afectados por esta enfermidade, pero, segundo a Confederación Española de Asociacións de Familiares de Alzhéimer e outras Demencias (Ceafa), calcúlase que o 13,2% das persoas maiores de 65 anos sofre esta enfermidade, o que se traduce en preto de 810.000 pacientes en toda España. No que respecta a Galicia, segundo os datos que manexa a Federación Alzhéimer Galicia (Facal) estar a falar duns 70.500 enfermos con alzhéimer ou algún outro tipo de demencia.
