A realización das obras necesarias para minimizar o impacto de futuras inundacións en Xunqueira continúa a súa tramitación superados os dous anos e medio da riada que arrasou o barrio vivariense e na que faleceu unha veciña. O paso máis recente é a adxudicación da redacción do proxecto construtivo á empresa Enxeñería do Noroeste S.L., que ten preto de 50.000 euros de orzamento e un prazo de execución de seis meses para finalizar este traballo. Posteriormente abrirase outro proceso para a execución material da obra, ouna actuación estimada no medio millón de euros.
Augas de Galicia adxudicou a redacción deste proxecto que, segundo indican, "servirá de base para executar as actuacións que contribúan a minimizar ou risco asociado á área identificada como de risco potencial significativo de inundación do río Fontecova ao seu paso polo núcleo de Xunqueira". Parte dos traballos a definir neste proxecto construtivo consistirán no ensanche e naturalización do leito do río ou no aumento da sección de varias pontes, pero tamén se reforzarán cimentacións danadas, mellorarán algunhas infraestruturas pegadas á canle e recolocarán o lavadoiro do barrio.
Tras a riada do 18 de novembro de 2018 o departamento autonómico elaborou un plan específico de riscos de inundación para Xunqueira no que propuña ao Concello varias alternativas de obras a realizar para reducir o perigo de futuros desbordamentos do río. Augas tamén recomendaba ao ente local tomar "medidas precisas para protexer a poboación ante episodios de enchentes", como a aplicación de políticas urbanísticas que respecten a contorna do río, a redacción dun plan de actuación municipal fronte ás inundacións ou promover a contratación de seguros contra os danos por riadas, segundo recordan desde a Xunta, que financia xunto ao Concello e á Deputación de Lugo a realización destas obras en Xunqueira.
Doutra banda Augas de Galicia tamén está desenvolvendo plans específicos de xestión en nove zonas fluviais con maior risco de inundacións. Entre elas está precisamente a do río Fontecova en Xunqueira e a do río Trasposta, que baixa cara á cidade de Viveiro e que tamén ocasionou unha riada con inundacións no centro o mesmo día.
