Adrián Ben asina a súa mellor marca persoal nos 1.500

O atleta lucense Adrián Ben Montenegro finalizou na quinta posición no 1.500 metros ao aire libre que se disputou este xoves no mitin iberoamericano, que se disputou en Huelva. O atleta vivariense superou a súa mellor marca persoal nesta distancia ao aire libre por oito centésimas, xa que parou o crono en 3.37.79 minutos, cando a súa mellor marca anterior databa de 2019, nunha proba en Castelló, onde fixo 3.37.87. Adrián Ben remontou nos últimos douscentos metros e o seu bo final permitiulle remontar posicións ata a quinta.

Nesta proba impúxose o belga Ismael Debjani, cun tempo de 3.36.71, por diante de Isaac Nader, de Portugal, que parou o crono en 3.37.01. Subiu ao podio o español Ignacio Fontes, que terminou terceiro con 3.37.28.

Diante de Adrián Ben, por unha soa décima, acabou o luxemburgués Charles Grethen, con 3.37.78. A carreira non foi todo o rápido que se esperaba, a pesar de que o uruguaio Santiago Catofre exerceu de lebre. Pero se distanciou demasiado do grupo. Adrián Ben sempre estivo na parte media e traseira do pelotón, esperando a parte final para sacar o seu demoledor final. E fíxoo na contrameta, a falta de algo máis de 200 metros. Aí foi cando empezou a adiantar a varios atletas e entrou na recta de meta como quinto clasificado. Intentou superar ao luxemburgués, pero a pelexa levoulla este último polo cuarto posto na cidade andaluza.

A nova marca ao aire libre nos 1.500 metros de Adrián Ben demostra que aos poucos vai adquirindo un gran estado de forma de face a participar nos Xogos Olímpicos de Tokio, onde correrá a proba dos 800 metros, e que é o gran obxectivo desta tempada.