O deputado autonómico do PP, Daniel Vega, xunto aos edís ribadenses Jesús López e Juan Estévez, mantivo un encontro cos integrantes da nova directiva da Asociación de Comerciantes, Industriais, Servizos e Autónomos (Acisa). O empresariado demandoulle ao partido que goberna a Xunta que amplíe os pases para acceder ao monumento natural de As Catedrais. "Queremos que ademais dos hoteis, tamén os teñan os restaurantes para ofrecerlle máis servizos á nosa clientela e así poder seguir aumentando en número de asociados", matiza.
No encontro participaron por parte da patronal o seu novo presidente, Francisco Iriarte; o xerente, Jesús Pérez; o vicepresidente, Juan Andina; a secretaria, María Antonia López, e a tesoureira, Manoli Torviso, así como os vogais Rocío Pertejo e Diego Valcarce.
Acisa estudará a proposta dos populares de trasladarse a outra sede en Ribadeo.
Ademais, a entidade demandou da Administración galega que lles entregue bolsas de papel, de tres tamaños distintos e gratuítas, para repartir entre os asociados do comercio. Tamén solicitaron outras específicas para os restaurantes co obxectivo de que "os clientes poidan levar as botellas de viño que non remataron de consumir nas súas comidas e ceas. O que pretendemos é aforrar custos e tamén vender a imaxe de Ribadeo", din.
