Un Nadal sen plans a longo prazo é o que planea polas rúas de todo o país, aínda que na comarca resístense a darse por vencidos e a maioría dos concellos envórcanse coas actividades complementarias, convencidos de que é un revulsivo para que a xente invista nos negocios locais. Uns establecementos que apelan á solidariedade dos clientes próximos e aos que invitan a consumir na zona. O aceso nesta ponte das iluminacións do Nadal marca o inicio dunha campaña que debería ser a mellor para o comercio local, pero a incerteza esta aí.

Mondoñedo foi a primeira localidade mariñá en contar con iluminación do Nadal, que se acendeu o pasado martes na cidade, onde están en marcha tamén diversos concursos de decoración para que a localidade luza aínda máis bonita.

Uns certames, como o de escaparates, polo que tamén apostan desde o Centro Comercial Aberto de Foz (CCA) e co que buscan, segundo o seu presidente, José Carlos Paleo, "contribuír a crear un bo e alegre ambiente de Nadal" nunhas rúas nas que este xoves acenderase a iluminación. Unhas luces que este Nadal tan atípico prometen "chegar a todos os recunchos do concello", así que tanto a vila como as parroquias lucirán engalanadas.

En Viveiro o Nadal tamén se converte en algo especial, coa visita tradicional ao belén xigante. A montaxe de Viveiro "ante ou berce" xa está concluído para ser visitado desde o domingo, aínda que este ano con especiais medidas de seguridade para adaptarse á normativa sanitaria. Unha visita que se recomenda planear con antelación para evitar as horas máis concorridas, pero que animan a non deixar de facer e é que merece a pena admirar o labor realizado pola Asociación Amigos do Casco Vello, co que colabora o Concello de Viveiro e a Deputación.

O sábado acenderase a iluminación, ás seis da tarde. O mesmo día arrincará tamén en Burela, para o que se apostou por un grupo musical, a Mekanikarollingband, para amenizar este punto de partida a uns días nos que os negocios confían na responsabilidade, pero sobre todo en ser a primeira opción duns clientes que lles axuden a soportar os duros días de peche perimetral que aínda impiden acceder a xente de fóra aos seus establecementos.