Os problemas de visibilidade como consecuencia dos densos bancos de néboa que afectan á zona do Alto do Fiouco, entre os municipios lucenses de Mondoñedo e Abadín, volveron obrigar á Dirección Xeral de Tráfico a manter pechada ao tráfico a Autovía do Cantábrico (A-8) nese punto.
A autovía foi pechada en ambos os sentidos da circulación ás 06:56 horas, concretamente entre os quilómetros 536 e 552, de modo que a Garda Civil habilitou desvíos alternativos pola estrada Nacional 634 ao seu paso polo municipio de Mondoñedo.
Precisamente, a alcaldesa de Mondoñedo, Elena Candia, reuníase a semana pasada coa subdelegada do Goberno, Isabel Rodríguez, e co xefe da Demarcación de Estradas do Estado en Galicia, Ángel González del Río, para volver reclamar obras de reparación na estrada Nacional 634 ao seu paso por ese municipio, dado que considera que non está nas condicións debidas para absorber o tráfico derivado da A-8.
En declaracións aos medios de comunicación, Candia recordou que “a estrada nacional é unha alternativa que se usa cando a A-8 queda pechada por mor da intensa néboa que se acumula no Fiouco”, pero “o seu mal estado impide unha circulación en condicións de seguridade”.
Aínda que estivo aberta á circulación de forma intermitente, a Autovía do Cantábrico (A-8) permaneceu pechada ao tráfico a maior parte do tempo durante a pasada semana como consecuencia dos densos bancos de néboa que dificultan a visibilidade e comprometen a seguridade dos usuarios.
