A Autovía do Cantábrico (A-8) reabriu este xoves pola tarde ao tráfico no tramo que resultou danado pola explosión dun camión que chocou con outro por alcance este mércores pasado no quilómetro 527, á altura da localidade de Celeiro de Mariñaos, no municipio de Barreiros.
Os dous carriis en sentido Baamonde quedaron totalmente habilitados para a circulación logo da realización dos traballos de reparación precisos por parte de persoal de mantemento do Ministerio de Fomento.
Está previsto que os operarios retornen o venres a Autovía, pero agora traballarán para acondicionar un dos carriis en sentido Asturias, o esquerdo, que tamén resultou danado a consecuencia da explosión do camión e o derrame do combustible sobre a calzada, e que permanece pechado.
Doutra banda, a Dirección Xeral de Tráfico tamén advertiu onte de que o tramo do alto do Fiouco estaba transitable con precaución, debido á presenza de néboa.
