Os densos bancos de néboa que dificultan a visibilidade e condicionan a seguridade dos usuarios obrigaron a cortar a circulación na Autovía do Cantábrico (A-8) ao seu paso por Mondoñedo, no Alto do Fiouco, que permanece coa circulación interrompida desde este xoves.
Segundo a información facilitada pola Dirección Xeral de Tráfico (DXT), a autovía quedou cortada este xoves -13 de maio-, ás 21:14 horas, en ambos os sentidos da circulación, concretamente no tramo comprendido entre os quilómetros 536 e 552, o que coincide co Alto do Fiouco.
Como é habitual, os condutores que circulan pola autovía son avisados mediante a correspondente sinalización e os paneis luminosos desa circunstancia. Habilitáronse os correspondentes desvíos alternativos a través da estrada Nacional 634, ao seu paso por Mondoñedo.
Os problemas coa néboa nese punto da Autovía do Cantábrico son recorrentes e, de feito, está en marcha un proxecto de Ministerio de Transportes, Mobilidade e Axenda Urbana coa instalación de prototipos sobre o terreo que permitan avanzar en solucións alternativas para superar esta situación.
Un novo sistema de balizas intelixentes instalado pola Dirección Xeral de Tráfico (DXT) comezou a funcionar en xaneiro nese tramo da Autovía do Cantábrico (A8) entre Mondoñedo e Abadín, co obxectivo de reducir nun 78% o tempo que ten que permanecer pechada esa parte do trazado como consecuencia da néboa.
