Os densos bancos de néboa que dificultan a visibilidade e condicionan a seguridade dos usuarios obrigaron á Dirección Xeral de Tráfico a manter cortada desde o domingo na Autovía do Cantábrico (A-8) en ambos os sentidos da circulación ao seu paso polo municipio lucense de Mondoñedo, no Alto do Fiouco.
Segundo informaron a Efe fontes do Subsector de Tráfico da Garda Civil de Lugo, a autovía permanece cortada entre os puntos quilómetros 536 e 552 desde onte ás 17:23 horas, por mor da néboa.
Son frecuentes os avisos por visibilidade reducida nese punto da A-8, o que levou ao Ministerio de Fomento a adoptar diversas medidas de precaución, como a posibilidade de pechar ao tráfico de forma automática a autovía cando a néboa condiciona a seguridade da circulación ou a instalación de dous radares de tramo, un en cada sentido da marcha.
Así mesmo, Fomento licitou a mediados de marzo o proceso de probas con prototipos para tratar de liquidar os problemas de seguridade que provoca a néboa nese punto do trazado, unha iniciativa á que destina máis de sete millóns de euros.