A Consellería de Infraestruturas iniciou o proceso para a cesión do edificio da estación de autobuses de Vilaba ao Concello, á vez que proxecta a instalación dunha nova parada no exterior desta instalación, que suporá un investimento autonómico de 40.000 euros.
A Xunta e o Concello de Vilalba acordaron iniciar a correspondente tramitación para reversión desta infraestrutura a favor da Administración local, proposta que posibilitará o peche como estación de autobuses e permitirá o uso do edificio para outros fins municipais.
Na actualidade, dixo a Xunta, a estación de autobuses de Vilalba, aínda que está aberta o público e serve de base para estes vehículos de transporte regular con parada na localidade, "non esta funcionando como tal estación". "O edificio está pechado, tanto os locais comerciais, como a cafetería como o despacho de billetes e, no último verán, acrecentáronse os actos vandálicos e o uso ilícito dos locais", explicou a Administración galega.
Deste xeito, e no marco do convenio co Concello, o departamento de Mobilidade da Xunta previu iniciar a tramitación do correspondente permiso municipal para acometer as obras necesarias para habilitar no exterior da terminal a nova parada para a espera e recollida dos viaxeiros, para o que se prevé a instalación de dúas marquesiñas.
Con esta nova parada mantense a prestación do servizo aos viaxeiros que utilizan actualmente as dársenas da terminal de autobuses, que é "moi escaso". Segundo os datos da última campaña de aforamentos, realizada nos meses de agosto e setembro, na estación de Vilalba a media diaria de viaxeiros que soben ou baixan do autobús é de 50.