A Consellería de Medio Rural desenvolve tres proxectos en Begonte que permitirán acondicionar seis quilómetros de camiños, segundo explicou o delegado territorial da Xunta en Lugo, Javier Arias, quen adiantou que o investimento total ascenderá a 164.400 euros.
Arias tivo ocasión de comprobar xunto ao rexedor, José Ulla, o estado das obras que se executaron en Gaibor e adiantou que se reformarán dous camiños máis en Saamil e A Hedreira, que dan servizo a parcelas agrícolas e instalacións agrogandeiras.
No caso de Gaibor acondicionáronse 1,8 quilómetros entre a zona do Campo da Feira e a intersección coa LU-541, un proxecto que se executou con 48.000 euros do Plan de Infraestruturas Rurais. +
Ademais, a Xunta destinará 54.300 euros do plan marco de mellora de camiños municipais á reforma de dous quilómetros da vía que discorre por Bóveda, pasa por Saamil e chega ata Os Grandíos. Estenderase unha capa de firme de aglomerado en quente de cinco centímetros de espesor.
Unha intervención similar realizarase na pista que vai dos Grandíos a Santa Marta, pasando pola Vila e A Hedreira, e que contará con 62.100 euros.